心悠BB萌玩網球

問到點解想學打網球，「心悠BB」解釋話：「我嗲哋打網球好叻o架，細個嗰陣見佢打波覺得好型，嗲哋第一樣教我嘅運動就係網球，所以特別有意義！因為當時7歲嘅我太細，教練話要等我大個啲先可以教得，所以嗰時我已經同自己講長大後一定要再學。雖然讀中學時我有加入網球學會，但嚟咗香港發展之後，因為呢度啲女仔只係鍾意『踩機』Keep Fit，唔愛其他運動，喺搵唔到Parter同我打嘅情況下，惟有揀自己一個都可以玩嘅跑步嚟玩啦！」

蘇浩剛教練級猛人

今次負責做心悠導師嘅，係前香港首席球手Henry蘇浩剛，佢曾係國際男子職業網球總會排名球員，又代表過香港出戰台維斯盃。Henry亦係香港首位考獲澳洲網球專業教練總會 （ATPCA） 最高教練級別「Master Pro」嘅教練，並獲授權喺香港開辦ATPCA認可教練培訓班。Henry咁專業，教心悠打波當然冇難度，但佢第一課仍係由基礎入手，分別教咗「心悠BB」正手、反手同埋進攻、防守方法，令心悠獲益不淺！

進攻防守 進攻同防守嘅分別在於防守係對手畀你少啲時間做準備，你揮拍動作只能夠細啲，亦要借力打番去對手場區。相反，如果個波嚟得慢，有時間畀你做出較大動作，咁就要加大力度打個波過去，呢個就係進攻。

劉心悠睇得又跑得，啱做渣打馬拉松Icon！

上完堂嘅心悠亦對蘇浩剛讚不絕口：「教練好好人呀！可能佢知我性格好勝，所以不斷用挑戰任務、同佢決勝負嘅方式嚟教，絕對唔悶！」落堂後心悠更主動向Henry「抄牌」攞電話，話之後要繼續拜佢為師，希望唔使用十年時間，就可以好似啲外國球星咁勁！

仲係新正頭，心悠同Henry拜年有心唔怕遲。

Henry好有心機教心悠打波。

今年目標 一個鐘跑完10K

雖然心悠近排忙於拍劇，但講到下周日開跑嘅「渣打馬拉松」，佢就話即使幾忙都會全力備戰：「之前跑10公里我都係以輕鬆心態上陣，跑得幾多得幾多，但今年有啲特別，因為我會第一次為自己定下目標，就係要喺一個鐘頭內跑完。依家我主要鍛煉耐力，跑一日、休息一日再跑一日，希望可以達成目標。」

被問到藝人身份去跑「渣打馬拉松」往往成為焦點，會否有更大壓力，心悠就話：「絕對唔會！因為付出努力練跑嘅係我，只得我可以評價自己，其他人嘅批評唔會影響到我。因為運動係我鍾意嘅嘢，雖然成績唔叻，但我仍然樂在其中。」

Henry最迷蘭度！

早前李娜再次打入澳網決賽，令好多亞洲人鼓舞，身為「網球人」嘅Henry蘇浩剛都唔例外。咁啱「娜姐」會喺3月4日到港，參加喺亞洲博覽館舉行嘅「法國巴黎銀行網球名將交鋒」，同前世界一姐禾絲妮雅琪打番場波，Henry當然唔會錯過，已經搵定波飛入場睇。

不過，講到嗰場波，Henry就話仲有場戲碼令佢更期待：「仲有場由麥恩萊同蘭度對打嘅表演賽，佢兩個都係叱咤一時嘅經典人物，夾埋贏過十幾次大滿貫錦標。而我細細個時已經睇蘭度打波，當時佢同艾保鬥得難分難解，印象好深刻，所以今次冇理由唔睇咯！」

圖／文：司徒子文

服裝：adidas

Hair：eric chow@Xenter

Make up：Jan Chan@AnnieG make up center