今日大年初四，喺度祝各位讀者蛇年行大運，無論事業學業都順順利利。有唔少讀者同朋友同我反映，話近期本欄少咗好多抽水位，可能係因為小弟嘅專欄相由爆炸頭Look變為斯文西裝Look，所以講嘢都收斂咗。另一原因係勒邦占士（LeBron James）自從拎咗人生首個冠軍後，份人成熟咗好多，都冇乜位可以插佢咯。不過近期占士又有一番「偉論」，令我忍唔住又要抽下水。
早前占士同記者呻自己拎唔到自己應得人工，話如果自己去打棒球，可以拎到比呢家更高嘅人工。占士今季年薪「只係」1,750萬美金，比高比拜仁（Kobe Bryant）2,780萬美金差成條街，聯盟中就有12個人高人工過佢，睇到呢度，占士嘅粉絲係唔係想爆句：「有冇搞錯？」平心而論，如果NBA同MLB容許球隊組班費不設上限，我相信占士、Kobe同杜蘭特（Kevin Durant）嘅年薪至少可達5,000萬美金。
但有冇諗過，如果NBA組班費「不設防」，就會加劇貧富懸殊嘅情況，影響成個聯盟嘅生態。以小牛班主古班嘅財力，分分鐘可以以高薪簽晒占士、杜蘭特、杜域侯活（Dwight Howard）、迪倫威廉士（Deron Williams），到時年年拎冠軍，咁NBA仲有乜咁好睇？再者，當初占士不惜眾叛親離，寧減薪，就係為咗成就冠軍夢，呢個世界有樣嘢叫等價交換，Come on James，又要錢又要面，未免太大貪啦！
而且連同廣告收入，占士一年已經搵緊5,000萬美金，仲未計周邊投資，佢已經係NBA吸金能力最強嘅球員。有好多所頂薪球員好似加納特（Kevin Garnett），由於人氣唔係最勁，所以商業收入只係占士10%左右咋。所謂貪字得過貧，希望朋友阿水詛咒成功，占士永世都係「一冠王」！