【本報綜合報道】快艇今季戰績起飛，穩坐洛杉磯「一哥」寶座，新加盟的「第六人」哥羅福可說居功至偉。快艇會方昨日更自製宣傳單張派街坊，向一眾西岸教頭Hardsell哥羅福可以進入全明星賽，如此勞師動眾，快艇都算錫到哥羅福「燶」咯！
NBA全明星賽下個月就殺到，東西岸後備球員名單將於本周五出爐。由於正選陣容係球迷票選，人氣及知名度成為重要因素；反而後備名單則由教練話事，場上貢獻比名氣更為重要。有見及此，快艇特別炮製哥羅福傳單，列出一眾球評家及隊友對哥羅福的正面評價，製作真係非常認真。
不過，西岸好波之人真係比比皆是，只係計後衞已經有占士夏登、韋斯布克、柏加及美奧等猛將，哥羅福想突圍而出參加全明星賽，明早快艇大戰鬥雷霆當然要把握機會「騷哥利」。（now 635、廣東體育及中央5台周三早上11時30分直播）
另外，以漢臣及保曼為首的西雅圖財團終於落實收購，昨日以5.25億美元（約40億港元）收購帝王65%股權，來季勢必將球隊搬至「雨城」，並重新命名為西雅圖超音速。