有人話中國乒乓球隊求其派幾個球手出去打，都可以攞世界冠軍，原來中國乒團真係咁諗！中國男乒最近搞咗個網上選舉，由網民投票初選今年5月巴黎世乒賽嘅中國男單代表，結果馬琳成為票王，獲得82萬多票，王皓同郝帥分列2、3位，上述3人直入選拔賽決賽，角逐5個男單代表名額，至於得票排三甲以外嘅張繼科、馬龍等十幾位球手，就要喺隊內打生打死，爭奪餘下席位。