4大最難忘戰役
22年征戰，參賽場數上千計，留下幕幕經典，叫阿寶挑選「最難忘一役」，他即面有難色：好難揀喎！」最終他道出4場別具意義的歷史戰役，亦代表他競賽生涯的4個里程碑。
91亞青賽 搵到目標
剛開始踩車，喺香港亂打亂撞，直至贏完亞青金牌後終於搵到目標，畀自己一個承諾，就係要成為亞洲冠軍！嗰陣有個好低能嘅諗法，覺得「老嘅淘汰晒，咪輪到我囉」，後來當然知道唔係，但呢個承諾一直放喺心底。
97全運 感動回歸
香港回歸成為中國一部分，第1次用特區名義參加全運，感覺好似同失散咗好耐嘅親兄弟重聚，民族意識好強烈，好親切，心情特別激動，啲愛國feel出晒嚟，仲要畀我贏埋金牌，無論對自己或香港體壇都有雙重意義。
98亞運 兌現承諾
由94亞運攞第4、跟住亞洲賽攞前3，跳到呢屆亞運終於贏到金牌，兌現當年承諾，真係好開心！跟住同沈教練講我要搵嘢做，唔踩喇！因為當時只視踩車為興趣，點都要搵份工，後來畀教練勸服，亦開始視單車為工作。
07世界賽 踩出彩虹
着起彩虹戰衣係每個單車仔嘅夢想！其實喺香港從事全職項目，要贏世界冠軍都好艱難，作為單車界第1個做到嘅人，我創造咗歷史，亦為港隊衝擊世界舞台取得好開始。時至今日，我哋已經有3個車手攞到彩虹戰衣！