黃金寶幸福宣言
「單車揀咗我，係我一生中最幸福嘅事！」征戰22年的黃金寶以「幸福」二字為自己的光輝歲月作總結，8,030日風雨不改、年中無休的單車生涯，「踩」過的哩數可以圍繞地球走幾轉，即使曾經跌過、痛過、哭過....，但他慶幸自己踏上這條「不歸路」，因為所贏的不單是獎牌、榮譽及名利，更改變了他的人生。已脫下戰袍的「車神」回望過去無限感恩：「單車就係我嘅信仰，佢帶畀我嘅嘢超乎你想像！」如果當初沒有選擇單車，阿寶笑言：「我諗都幾大鑊！」
師徒信約 守足18年
今日大除夕，相信沒有甚麼比找到上月才退役的黃金寶作壓軸專訪更夠分量的稿了。訪問當日，走入「阿寶」家門前，見到擺放着大大小小4、5部單車，還有頭盔、零件四散，果然是「車癡」。適逢他趁長假執屋，書房內滿布陳年舊照和剪報。凝望一幅幅老相片，連阿寶都說：「咁就廿幾年，時間過得真快。以前日日練車，默默耕耘，要跟車隊生活，長期出外，好老實，如果要重新嚟多次，我都唔敢講可以做到。」阿寶更坦承冇諗過會踩22年：「最初睇死沈教練只係嚟幾年，哈哈，所以咪講『你教幾耐咪跟你幾耐』囉。」揭開這句經典對白「謎底」，原來好搞笑，誰料師徒信約一守就是18載！
自90年加入香港隊，91年揚威亞青，「阿寶」之後獲獎無數，5戰奧運、3次在亞運和全運摘金、甚至榮膺世界冠軍，獎牌獎盃多到一個閣樓都放唔晒，即使在2012年，39歲的他都沒交白卷，3月重奪亞洲賽錦標，首披代表亞洲No.1的「白色戰衣」，8月倫奧公路賽以第37名衝線，奧運之旅亦算圓滿，難怪他用「雖不完美、但無遺憾」來總結22年成績。
「最開心係能夠將興趣變工作，人生得到鍛煉，要贏嘅比賽都已贏過，其實早就超標完成，幾年前亦有朋友叫我『見好就收』，但我卻想經歷埋走下坡嘅逆境，等日後轉做教練有更多經驗輔導運動員。人無完美，贏晒固然更勁，但我已經好好，起碼期間冇遇過大意外，唔係因受傷被迫收山，都算係『光榮引退』啦！」
唔踩車 我會好大鑊
11月環太湖賽後卸下戰袍，黃金寶首次享受近兩個月嘅長假，但每天仍會踩車鬆腳，他對單車的愛，是你我無法理解的：「見到架車，好似一定要踩吓至安樂，就算明知冇今日（成就），畀我再揀一次，我都會行番呢條路。對我嚟講單車就係信仰，佢帶畀我好多好多，不單止是獎牌榮譽，仲決定我人生，影響我思維同行為。」如果冇踩車，你覺得自己條路會點走？「阿寶」想了3秒後答：「我諗都幾大鑊！屋邨仔，書讀唔成，脾氣又臭，真係唔敢想像，愛上單車，反而令我專注做事，單車揀咗我，係我一生中最幸福嘅事！」
當然，幸福非必然，「阿寶」風光背後的付出和犧牲，絕不是人人做得到：「我踩過5屆亞運，除咗第1次攞梗頸四，之後4屆公路賽贏到3金1銅，諗番轉頭都覺得『恐怖』。」驕傲、自豪嗎？「冇考慮咁多，我唔敢話自己好成功，但只想講我所謂嘅『成功』方法其實冇秘密，亦唔神化，最重要肯投放時間，按部就班，唔急進，練兩年冇成績就諗退役，我成日同班師弟講『人有你要有，人冇你更加要有』，犧牲一定要，如果衡量過唔得寧願一刀切，千祈咪一邊做一邊怨，到頭嚟一事無成！」
港人厚愛 只因緣分
人人都叫黃金寶做「亞洲車神」，但他卻很有保留：「咁叫梗係唔好啦！不過都知好多人錫我，好多運動員都贏過亞運金牌甚至世界冠軍啦！唔知點解香港市民對我特別好，可能係一種緣分。」他愈講愈High：「曾經聽過基層市民同我講：『阿寶，你好×勁呀！』雖然中間夾咗雜咗粗口，但你知佢係讚緊你，支持緊你。能夠得到社會上唔同層次朋友嘅認同、關心，係另一樣好幸福嘅事，呢啲額外收穫比攞獎更開心。」
最後，問「阿寶」會否出自傳，他表示「唔想為出而出」：「之前好多人話幫我寫書，沈教練亦希望我同年輕一代分享奮鬥故事，不過只係齋寫訓練時間表，紀錄比賽成績嘅話就好冇意思，如果真係要寫，我想帶出正面訊息同人生觀。」場內場外皆典範、渾身發放正能量，香港體壇擁有黃金寶，又何嘗不是福氣呢？
22載光輝全紀錄
a. 亞青公路賽金牌（1991）
b. 3面亞運公路賽金牌（1998,2006,10）
c. 3面全運公路賽金牌（1997,2001,09）
d. 2面亞洲賽公路賽金牌（2001,12）
e. 1面世界場地賽捕捉賽金牌（2007）
f. 2面世界盃場地賽金牌（2008,09）
g. 5次參戰奧運（1996、2000、04、08、12）
h. 榮譽勳章（1998）
i. 銅紫荊星章（2007）
j. 香港10大傑出青年（2007）
k. 8次香港傑出運動員（2000-01,04-08,10）
l. 3次香港傑出運動員「星中之星」（2006,07,10）
m.香港教院榮譽院士（2010）
n. 香港城大榮譽院士（2011）
後記……
作為香港體壇Icon，阿寶的使命感由心而發，訪問當天要求「寶神」與其「好拍檔」影張合照，他再三強調一定要影埋頭盔，因為這是踩車的安全必須裝備，無時無刻都要做個好榜樣。正如阿寶雖有駕駛執照，但他的駕駛車速與踩車差不多，絕不超速。記者與阿寶識於微時，過去20年有幸見證這個屋邨小子成為亞洲車神的傳奇，而在他運動員生涯最後一次專訪中，更獲寶神親自炮製一杯榛子咖啡及獲贈小盆栽作紀念，實在與有榮焉。
圖／文：李芷韻、Maggie