尼古恩爆貪靚日記
憑靚仔外形秒殺女粉絲嘅德國體操萬人迷尼古恩（Marcel Nguyen），尋日展開訪港首場公開活動即令尖東陷入一片瘋狂狀態，皆因擊掌會後逾百名癡情Fans一齊追出麼地道，場面墟冚。其實又抵尼古恩咁受歡迎，事關佢對記者提問及粉絲要求「有求必應」，除笑住送出「愛的抱抱」冧爆女粉絲之外，更喺專訪中自揭巨胸紋身的秘密，仲自爆每日花一小時扮靚，定時修整眉毛等鮮為人知私事呢！
「攞正牌」奉旨攬女
電眼、咪嘴笑或招牌露齒笑，加上甜甜酒窩嘅尼古恩，齋睇長相似Model多過運動員，有人話佢脂粉味重，但其強壯臂彎及健碩胸肌，卻又Man到爆炸，加上其身份為現役軍官，令呢位倫奧男子全能及雙槓銀牌得主，同時擁有鐵漢柔情嘅特質。
好似尋日喺尖東與本地體操新秀交流示範後，尼古恩做人肉布景板被女記者及粉絲輪流合照，問到女朋友Alexa可有呷醋？尼古恩笑笑口話已「攞正牌」：「女朋友知道我在做甚麼，亦十分支持我，以前佢係游泳運動員，明白體育事業係點發展，所以從來唔會嬲！」幾乎奉旨畀女圍嘅尼古恩，示範後再現身帝國中心出席擊掌會，逾200名女Fans一早舉牌排隊等候，部分冇飛人士則企喺商場上層靠着欄杆得個恨字。千呼萬喚始出來嘅尼古恩索性脫去外套，僅穿黑白間背心、隱約地露出心口紋身亮相。原本只是Give me Five 擊掌會，但有粉絲情不自禁突然要求「Give me Hug」，尼古恩亦大方抱抱，惹來四周伊嘩鬼叫！
忍受痛苦才會成功
提到巨胸紋身，尼古恩自爆考慮一段很長時間才決定：「今年四月份決定紋上，我覺得「Pain Is Temporary, Pride Is Forever」很有意思，已成為我嘅座右銘。」但比賽時尼古恩會在心口撲上粉，令紋身顏色變淡，以符合國際賽的要求，但平日生活上尼古恩就毫不吝嗇好身材，衣櫃內幾乎最多係V領或大領背心，大方騷肌兼紋身。
父親為越南人、母親為德國人，混血兒尼古恩對自己嘅外表坦言每一部分都十分滿意：「每朝早我都花時間梳洗以及Gel好髮型，仲要整理一下眉毛，大約都要一個小時，唔算太誇張吧！其他地方我就冇化妝，不過有時候會去美容中心修眉。」
Marcel Nguyen知多啲
國籍：德國
年齡：25歲
家庭背景：父親為越南人，母親為德國人
開始學習體操歲數：4歲
曾參與奧運：2008及2012
威水史：今年倫敦奧運為德國贏得76年來首面體操全能獎牌 2011年歐洲錦標賽雙槓金牌、單槓銅牌 2010年歐洲錦標賽成為首次贏得團體冠軍的德國隊成員之一
文：葉菁菁、圖：Vincent