好多球迷對馬刺無好感，原因如下：
（1）球風悶爆，即使近幾年比賽節奏加快，球隊得分破百，但始終欠缺一班表演欲強嘅球員。
（2）有好多有睇頭嘅球隊命都喪馬刺手下，包括帶起「快打旋風」嘅太陽、曾擁有大帝勒邦占士，立志建立皇朝嘅騎士等，就因為過唔到馬刺呢關，令佢地先盛後衰，進入重建期 。
馬刺係過去15年最少人支持嘅冠軍球隊，但佢地嘅球隊管理、選人同排陣，都因應時勢去調整，值得任何層面嘅管理層學習，包括︰
（1）擅於發掘國際潛力股。
（2）欠缺中鋒人才下，由雙塔戰術慢慢轉用適合自己嘅小球戰術。
（3）以團隊為上，建立十人嘅輪換陣容，將老將鄧肯同真路比利嘅保質期延長，未有因票房而漠視球員嘅健康。
前日由TNT作全國直播嘅馬刺對熱火，由於已經係9日內第6場作客比賽，馬刺教頭普波維治將鄧肯、柏加等4大主力收起，令NBA總裁史端發聲明作出追究，並且向球迷道歉。只有9名「籃領」球員嘅馬刺，一直同精兵盡出嘅熱火打成均勢，喺最後先畀雷阿倫嘅致命3分攻陷僅輸5分，真係要向普波維治脫帽致敬。
筆者好友、主播黃大鈞嘅意見代表部分球迷心聲，「如果冇晒球星坐陣，對原本買飛入場嘅球迷、買咗網上睇波通行證睇波嘅球迷、買咗轉播權嘅電視台同落咗廣告嘅贊助商，都有一種被呃嘅感覺！」的確，如果隊隊都保護自己嘅球員而派晒後備上陣，咁仲邊有人睇NBA？
不過，假設馬刺出晒4大主力而hea打，最後輸廿幾分，呢個做法不但令史端難以追究，球迷更可能半場已經罷睇，情況可能更惡劣。
筆者認為，當判斷標準係以商業同球隊管理兩個對立因素而定時，其實很難判斷馬刺今次收起主力嘅做法係啱定錯，但以團隊為上嘅馬刺今次擺明車馬挑戰強權，會唔會令佢哋往後受到聯盟針對性打壓影響爭冠機會呢？好戲在後頭！
邱益思