今屆一級方程式賽車已塵埃落定，FIA（國際汽聯）證實紅牛車手維度爾沒有違規超車，三連冠正式確立。老實講，今年係最好睇嘅一季賽車，唔單止有多名車手贏過分站冠軍，就連車手總冠軍都要鬥到最一站先知花落誰家，睇少一秒都覺得有損失。而能夠令今季比賽咁精彩，FIA真都花咗唔少心思架。
現今賽車運動規例有成幾百頁紙咁長，引擎及波箱通通都有嚴格規管，所以戰車馬力唔會有太大分野，比賽競爭性自然提升。而FIA為令娛樂性進一步提升，近幾年先後引入變型尾翼及動力回收系統令超車鏡頭大增。再加埋條「估佢唔到」嘅車胎，搞到每場車都七國咁亂，未揮格仔旗都唔知邊個贏。仲記得2000年起，車神舒麥加揸住架法拉利以無敵姿態贏得多屆總冠軍，比賽競爭性好低，唔少車迷都話比賽悶到抽筋，反正都係佢一個人贏晒，唔睇都冇乜損失。就算你都係「老舒」嘅死硬派粉絲，都希望有三至四個車手可以逼到車神使出真功夫，咪等佢贏得咁容易。
賽車如此，足球亦一樣。年年都係曼聯贏聯賽冠軍，你唔悶我都悶啦！所以上季由曼城捧盃，波男覺得對英超有好冇壞。球隊與球隊之間有競爭，自然可提升球賽娛樂性。其實運動之所以好睇全因兩個字，就係爭鬥，球隊為同一個目而進發，球員為冠軍而打到頭崩額裂，呢啲就係球迷所愛嘅畫面。明年春季，新一季一級方程式賽車又開幕，波男希望默默耕耘嘅阿倫素可以為法拉利攞番個冠軍。
波男Style