鳳凰城奇招救市

入座率聯盟排尾八

隨着星級控球後衞拿殊今季改投湖人，目前只以達基斯、哥達及比士利擔大旗的鳳凰城顯得毫無號召力，即使場均門票價格僅屬聯盟中等級的70美元（約542港元），奈何今季主場入座率只得81.8％，即是每場足足有成四千個「吉位」，入座人數更屬聯盟倒數第八差，難怪球隊高層望住一大片「吉位」即刻感到非常頭痕。

有見及此，鳳凰城的市場部決定花心思搞噱頭救市，球隊於香港時間周五早上（12月7日）主場鬥小牛一戰會推出「唔過癮可回水」的奇招，承諾球迷當晚一定盡興而歸。講到咁好玩，但有乜實質節目呢？鳳凰城方面暫時賣個關子，隻字不提具體方案。鳳凰城會長羅尼表示：「球隊依家冇乜球星在陣，但唔代表我哋嘅比賽就唔好睇。當晚（香港時間周五早上主場對小牛）如果邊位球迷睇得唔過癮、唔滿意嘅話，可以喺12月31日前上球隊官網填張form再寄番張波飛返嚟，我哋絕對會回水。」羅尼補充球會咁做係會有一定風險o架，隨時蝕到暈，但我對球隊非常有信心！」

蠱惑網友揚言「屈水」

「過唔過癮」可以好主觀，當地有蠱惑網友就已經度好橋「屈水」，聲稱只要鳳凰城輸波、場內職員斟瀉啤酒又或者廁所排長龍就會要求回水，隨時蝕爆鳳凰城都似！至於狀態沉到爆的鳳凰城，昨日作客以97比101不敵速龍，今夜造訪錄得近40年來首次單月十一場勝仗的紐約人都係聽炒，紐約人讓7.5分要上盤。（周一凌晨1時開賽）■本報綜合報道