商贊黃金歲月可以重來

體育運動除咗政府Backup,搵大財團做贊助已經係現時全球定律,揼心口呢個動作,喺所有體育運動嘅組織同隊伍入面,公關及財務方面屬最難做嘅事,但偏偏香港缺少呢方面嘅人才,亦係本地體壇唔能夠發光發熱嘅根本原因之一。

80年代香港經濟開始起飛,奢侈品湧入香港,唔少牌子為咗宣傳,都肯揼錢落體育活動,而當中最利害嘅肯定係煙草業。波男最記得當時港甲嘅「煙仔盃」,係各支甲組隊除聯賽外最重視嘅本地盃賽,當然獎金豐厚係最重要嘅原因,當年甚至有球隊專登搵外援返嚟踢一場決賽。至於賀歲波,當年「萬記」贊助亦係氣氛良好,年年爆滿,贊助商肯畀錢搞大佢,初一初四你想買張飛都難。

中超值得借鏡

唔單止足球,仲有90年代舉辦嘅沙龍網球賽,當年更係ATP計分賽其中一站,吸引到最Top嘅網球手嚟香港獻技,張德培、艾保、阿加斯同蘭度等全部嚟過。不過,上述嘅黃金歲月全因政府喺99年禁止煙草商贊助體育比賽而告終。

時至今日,香港體壇好似靜晒咁,波男就覺得其實係公關方面唔去諗新嘢啫,你睇吓中超隊隊波都有大水喉射住,球隊有唔同商品冠名,香港當然亦有唔少大孖沙,要佢哋揼錢其實未必好難,只係有冇人識同佢哋Deal,老實講,依家恒生指數成份股,都唔知幾多隻係中資股份啦,肯動腦筋向呢啲牌子埋手,點會搵唔到錢吖?

波男Style