煤工變拳王!30歲嘅雲南籍拳手熊朝忠於昆明舉行嘅世界拳擊理事會（WBC）迷你輕量級世界拳王爭霸戰，同墨西哥拳王馬丁內斯激戰12回合之後，成功掛上47.8公斤級別金腰帶，唔單只創下歷史，成為職業拳擊史上，首個中國人膺世界冠軍，更令原本做煤礦工嘅熊仔，一夜成名，成為了國家英雄，改變一生。
暱稱「小熊」嘅熊朝忠，上周六晚比賽表現狠勁，完全無令江東父老失望，最終成為歷史英雄，不過，熊仔嘅拳擊事業其實係半途出家，佢本身來自普通農民家庭，家境清貧，更因為屋企經濟差，高一就要輟學，搵工幫助生計，2000年嘅時候，更喺一家煤礦做煤工，每日擔煤超過10粒鐘，人工卻只得10蚊雞，難怪佢贏得金腰帶之後好感慨咁話：「拉煤令我身體更強壯，為拳擊事業打好基礎。」
06年係熊仔人生嘅轉捩點，因為睇見電視及報紙上刊登了有關雲南拳王徐從良嘅故事，令佢萌生學拳嘅念頭，「死慳死抵」籌得1800蚊去學拳兼生活費，膽粗粗開展職業拳手路。講到學拳條件，「小熊」就先天不足，身高只有1米55，臂展唔夠長，佢能夠成功完全係後天努力補夠，08年僅用2分28秒就KO泰國拳手，贏得WBC洲際拳王金腰帶，而呢一仗佢嘅兇悍積極作風，就被拳壇封為「中國小泰臣」。
熊朝忠嘅拳擊事業其實都幾坎坷，08年贏來6000蚊出場費，部分要還錢畀朋友，一部分儲起來，扣除幫補屋企，其餘最大開支就係餐費，佢說：「為了保證訓練同身體需要，牛肉係每餐唔少得，平均每日最少食半斤，再加菜和蛋，所以使費好重。」不過，今次贏得金腰帶實現咗自己嘅夢想，經過6年征戰同訓練，依家成為世界拳壇排名最高嘅中國職業拳手，成名後就會財源滾滾，跟住就有好日子過啦。