紅褲子迪安東尼煮到好「餸」

湖人棄用表現「一條蟲」嘅教練米克布朗,將帥印交到紅褲子出身嘅迪安東尼手上,我認為呢個選擇還是合適,相信佢亦係一位懂得「煮」好餸嘅「廚師」。

縱使不少球迷都渴望見到擁有11隻冠軍指環嘅積遜教練出山,不過可能係佢開出嘅條件太苛刻,才令湖人卻步,「退而求其次」簽下迪安東尼。以往迪帥與拿殊曾在太陽合作,雙方可謂惺惺相惜,佢今次入主「紫金兵團」,第一個好處肯定係令拿殊翻生,而作為美國男籃夢幻隊嘅助教,迪帥同班球星嘅關係點都比米克布朗優勝,夾起嚟都易啲。

「7秒戰術」考起湖人老將

我只係有少少擔心迪帥主張嘅「七秒戰術」,這戰術對擁有雙塔嘅湖人不太適合,而慈善世界和平(阿堤斯)、高比拜仁以及拿殊都「三張幾」,佢哋嘅年齡能唔能夠適應到呢個團隊嘅進攻模式呢?我都係抱有懷疑態度,所以迪帥需要作出某程度嘅調教,方為上策。

教練就好比一個廚師,一定要煮過好多佳餚美點,累積很多經驗,才有資格教其他人煮出好嘅東西。所以球員出身嘅迪安東尼教起嚟會更有說服力(即使不及積遜),眼前佢就有高比、杜域侯活、加素同拿殊等上佳材料,希望佢煮番餐好餸,唔好令湖人Fans失望。

蔡芳裕