楊柳青讀稿唔怕掃
NBA周三早上正式開鑼，除咗球迷高興外，現時喺now觀星台和芒果台節目做主播嘅「大隻青」（楊柳青）都好興奮。原來「大隻青」都好鍾意NBA同籃球活動，今次我哋邀請「大隻青」，除咗傾吓NBA同打籃球外，仲同佢進行一個大測試，考驗佢做節目主持嘅應變能力。
有林書豪梗撐火箭
「大隻青」話自己都好鍾意籃球活動，近排仲學緊功夫添，究竟學功夫同打籃球有咩關係呢？佢就話練功夫可以幫到打籃球，喺攻擊同防守都勁啲，各位打籃球嘅朋友可以考慮吓「大隻青」嘅建議。
講完籃球活動就將話題轉到NBA，咁多支球隊「大隻青」最鍾意邊隊？佢話梗係火箭啦！點解？因為火箭有林書豪吖嘛。「大隻青」滔滔不絕咁講出林書豪嘅來歷，仲話火箭以前都有個中國球星姚明，依家又有林書豪，佢兩個都係華人球員，特別有親切感，所以今季一定全力支持火箭，仲話火箭Sure Win，果然有做足功課喎。
講完NBA，係時候講番個大測試，其實只係趁「大隻青」讀緊稿時，另一位觀星台主播Hailey（陳俞希）就手執雞毛掃騷擾佢，等佢唔可以順利讀稿，不過「大隻青」係一位專業主播，呢啲咁小兒科嘅騷擾又點會難到佢，佢好輕易就完成咗呢個大測試，順利過關。
司徒子文攝
服裝提供：Adidas