高比行路籌款助露宿者
高比拜仁球技同心地一樣咁好！「高比仔」下月17日將聯同另一半雲妮莎參加洛杉磯一個慈善步行活動，為露宿者籌款。據《洛杉磯時報》報道，已連續第2年參賽的「小飛俠」，計劃由洛杉磯Exposition公園徒步走到市區，活動由去年舉辦至今已吸引超過28,000人參加，並籌得220萬美元的善款，預計今次活動將令更多露宿者受惠。
決定與雲妮莎以旗下基金名義參賽的「高比仔」表示：「好多無家可歸嘅人都染上毒癮，我哋唔單止要為佢哋提供遮風擋雨嘅住所咁簡單，最重要係進一步了解佢哋，解決佢哋嘅問題。」場外為慈善出錢出力，場內就繼續呼風喚雨，高比拜仁昨日貢獻全場最高嘅31分，奈何湖人最終仍於主場以80比114不敵爵士，季前賽四戰全敗。
J.Lin爆高中已受種族歧視
今場大敗已令湖人主帥米克布朗非常頭痛，新加盟嘅控衞拿殊就疑似同麻煩友「慈善世界和平」（阿堤斯）不和。事緣拿殊首節曾要求重新組織攻勢，但正持球嘅阿堤斯耍手擰頭。湖人隊友間嚴重缺乏溝通及信任，新季前景難免令人擔心。而昨日以副選出擊仍以97比96力克塞爾特人嘅籃網，明早回師主場料有迪倫威廉士等主將復出，再鬥「綠軍」必定有好戲睇。（now 678周五早上8時直播）
另外，以火箭球星林書豪做封面嘅《GQ》11月號昨日正式曝光，J.Lin急不及待「鋪」相到facebook與球迷分享。呢位火箭新星接受《GQ》訪問時坦言仍然受到種族歧視：「當年姚明入NBA時都畀好多人質疑，我由讀高中開始已經受到對方球員、教練同球迷嘅種族歧視，因為我係亞裔球員，所以我要長時間表現得好好先能夠獲得肯定。」