細威驚爆師徒戀
「細威」戀上法籍教練，仲喺街頭大展浪漫！重奪美國網球公開賽時大嗌「冇拖拍」，仍樂於做「Single Williams」嘅「細威」S威廉絲，近日被發現其實已經同法國籍型佬教練Patrick Mouratouglou撻着，二人喺巴黎市內溫馨拍拖時，「猴擒」嘅「細威」仲手插教練後褲袋，斷正！
二人「師徒變情人」證據確鑿，「細威」冇得抵賴嘞，唔通佢話自己「偷荷包」咩，否則好難解釋點解要伸手入Patrick嘅後褲袋囉。據法國網站《PK Tennis》爆出嘅相片所見，30歲嘅「細威」一副小鳥依人嘅樣，一路行街一路依偎喺Patrick身上，唔難理解嘅，自從同Patrick合作後，「細威」喺溫布頓、倫奧、美網3個大賽贏3個冠軍，梗係信晒佢啦。
Patrick教路連奪三冠
而且Patrick亦係才情橫溢嘅靚佬一名，花白頭髮嘅佢，成熟穩重，曾係法國網球學院「揸弗人」，兼且有法國男士嘅浪漫DNA，氹女仔絕對有一手，佢曾經自爆同「細威」「開始」嘅對話：「佢同我講『我想贏溫布頓，我想依家就開始』，於是我安撫佢『咁樣好簡單，我幫你！』」就係咁樣，「細威」失落法網後嘅「弱小心靈」，就得到Patrick嘅救助，還產生非一般嘅化學作用，難怪「細威」會傾心再拍拖。