有冇諗過可以嚇下或者氹下小朋友開心，抱住個籃球飛越火圈同睇晒NBA球隊鳳凰城太陽嘅賽事呢？呢個唔係幻想，有機會成為事實，因為太陽準備招騁表演者擔任球隊家傳戶曉嘅吉祥物大猩猩。
究竟舊嘅大猩猩發生乜事，搞到要請個新嘅呢？原來舊大猩猩早前喺一間餐廳同熱火fans發生爭執，被打傷鼻樑。雖然呢隻舊大猩猩只係後備演出者，唔係經常喺賽事見到嗰隻，但點都要請番個新嘅表演者返嚟作後補。
太陽嘅吉祥物大猩猩大約喺1980年底出現，其實係來自電視台嘅宣傳活動，其後喺休息時間為球迷表演，結果大受歡迎成為官方吉祥物。大猩猩除識普通入樽外，更有穿越火圈入樽嘅絕技，難怪喺2005年成功進入吉祥物名人堂，當年只有3隻吉祥物獲此殊榮。
講咁耐都未提過人工，吉祥物大猩猩嘅酬勞當然唔係香蕉而係現金。據舊大猩猩話大約有20萬美元（約156萬港元）一年，每個月有13萬銀港紙。各位如果符合以下條件，不妨去見下呢份工喎！
‧大專以上學歷
‧有花式入樽經驗
‧周末需超時工作
‧在極炎熱情況下執行工作
‧有超強幽默感