「飛人」保特有錢有面又夠浮誇，話佢唔「吸女」都冇人信，原來佢喺倫奧爭金期間，暗撻英國索爆野性名模Megan Edwards！二人喺商業活動結識，好快就打得火熱；保特奪金後帶Megan慶功見朋友，Megan就喺社交網上載二人合照「宣示主權」，似乎嚟真喎！
今年5月保特以「專心爭金」為理由，同斯洛伐克設計師女友分手，點知於奧運前遇到Megan，即時又起色心。Megan今年22歲，一身深棕色皮膚、黑色鬈髮加上逼爆身材，外表非常野性，佢仲係個業餘運動員，同保特好啱嘴形，難怪「飛人」即刻起痰。
據英國《太陽報》報道，二人齊齊喺商業活動推銷牙買加戰衣，雙方一見鍾情，好快就互傳「情慾短訊」，並於倫敦秘密約會，度過多個既激情又浪漫嘅晚上。
保特有愛情滋潤，於倫奧連奪三金威過威士忌，Megan就喺看台上不停為愛郎加油，非常冤氣。保特之後帶Megan去同朋友慶功，大把囡囡想埋保特身，據現場人士透露，Megan好醒目，成晚小鳥依人咁黐實愛郎，保特亦全晚睇其他女唔上眼，係人都知佢哋咩關係。Megan都知保特多女埋身，之後佢上載二人合照到社交網上，仲肉麻地叫保特baby，誓要瞓身纏實呢名「飛人」！
本報綜合報道