Winning 17人離「廠」後奪44冠！自05年奪取英足盃冠軍後，阿仙奴連續七年食白果，期間有17位球員離隊後做逃「兵」，轉會後終嘗到奪冠滋味（見附表），當中A高加盟車路士後取得7冠威到盡，只怪「兵工廠」自己唔爭氣！
阿仙奴7年無冠，球員心灰意冷，今夏先有尹佩斯投曼聯，跟住輪到桑治加盟巴塞。自05年起，有17個離「廠」球員共奪44冠，除A高捧盃捧到手軟，老將基拔圖施華喺希臘搵食都有得過吓捧盃癮，連蘇甘保及羅倫等人去到樸茨茅夫都贏到個英足盃，令「兵工廠」顏面無存！
另外，阿仙奴巴西左閘安德里山度士近日駕駛瑪莎拉蒂名車開到時速超過200公里，被當地警方追捕至球會訓練場附近先停低，已被落案控告危險駕駛，暫時保釋候審，下月將會上庭，一旦罪成，佢隨時要坐監。
