倫奧增設的女子拳擊賽事，英國選手阿當絲在51公斤級決賽中，在凱瑟琳王妃、安妮公主等皇室成員打氣，以及愛犬睇電視支持下，以明顯優勢擊敗中國希望任燦燦。原來阿當絲本身為一名兼職電視台「茄哩啡」，得以一躍成為奧運史上第一面女拳金牌得主，佢興奮咁話：「我嘅生活將會因金牌而改變。」
女拳三個級別賽事，51公斤級金牌率先決戰，三屆世錦賽冠軍任燦燦原本對金牌志在必得，可惜面對主場嘅阿當絲全場捱打，最終以7比16落敗。曾在英國熱播劇《加冕街》做「茄哩啡」賺錢幫補打拳嘅阿當絲，其愛犬Dexter雖未能入場撐主人，但Dexter喺一間動物中心亦獲特別安排，喺電視邊睇住直播，據悉狗狗睇到目不轉睛呢！
得到銀牌嘅任燦燦就話：「我大賽經驗仍不足，金、銀、銅都不重要，重要是我享受比賽、我成長了！」國際拳聯主席表示，下屆奧運女拳預計會增加一倍賽事，力爭六面金牌，中國隊在今屆女拳獲得1銀1銅，表現不俗。另外，中國跆拳道女將侯玉琢在57公斤級決賽中，亦以1比6不敵英國天才少女鍾絲，只能得到一面銀牌。