南韓「免兵役」勢擒日本
今晚奧運男足率先上演季軍戰，亞洲雙雄南韓同日本原本有望會師決賽，點知殊途同歸一齊爭銅牌，但兩軍現況大不同。南韓於四強輸畀巴西屬雖敗猶榮，後者上仗卻意外地被墨西哥反勝，身心俱疲下，頂唔住誓爭銅牌博「免役」嘅南韓，平手盤一於撐「太極虎」。（有線63、203及18台周六凌晨2時45分直播）
其實，日本人腳質素略勝一籌，但好多時唔可以齋計實力，仲有其他因素可以左右比賽大局。好似日本志切爭金，之前亦順風順水，豈料因自己一時失誤被墨西哥反勝，信心、士氣嚴重受挫，賽後個個抱頭痛哭，大軍一片愁雲慘霧，唔係一時三刻可以走出呢個陰霾，加上前鋒永井謙佑上仗已帶傷出戰，今仗上陣成疑。
唔使當兵更勝獎金
相反南韓上仗於優勝劣敗下輸畀巴西，眾將心情未受影響，由於南韓同日本一向有好深牙齒印，因此中場指揮官寄誠庸講明，若於季軍戰能戰勝日本的話，呢面銅牌價值等同金牌。除咗國家榮辱外，南韓球員亦有實際「獎勵」，一旦「太極虎」能夠喺奧運奪牌而回，眾將可免除兩年兵役，呢份大禮分分鐘仲吸引過獎金，班球員梗係搏盡啦！