羅切特獲贈鑽石黃金剃刀

「場上好成績+爆炸話題性」等於乜?梗係紅到爆啦!美國泳手羅切特今屆奧運繼續攞牌攞到手軟,而且話題多多,目前喺「花旗國」紅到發紫,除博到吉列送金鑽剃刀外,多間電視台仲為佢度身訂做開拍真人騷,呢次仲唔豬籠入水!

電視台搶拍真人騷

羅切特今年28歲,已攞咗11面奧運獎牌,加上佢一副明星相,本身已有好多fans。另外佢新聞多多,今屆曾戴上鑽石牙套攞牌,佢媽咪仲大爆佢鍾意玩一夜情,人氣簡直爆燈。人紅自然代言多,佢依家已有九個廣告贊助商在手,其中吉列近日就送咗兩支剃刀畀佢,一支用金做、一支就鑲晒鑽石,配合晒佢浮誇風格;另外各家電視台仲瘋狂向佢送劇本,話唔定好快就進軍荷里活。