碧咸教仔唔准(目及)

羅拉卓治可以話係「英國李慧詩」，喺當地人氣爆燈。佢首次出戰奧運就大豐收，連擸兩面金牌，其中喺團體追逐賽項目仲破埋世界紀錄。羅拉得廿歲女，笑起上嚟仲鬼死咁甜，現已成為英國宅男頭號女神。呢日沙排決賽，佢就同一班奧運隊友齊齊撐場，加埋哈利王子同碧咸，看台上可謂星光熠熠。

羅拉卓治引死哈利王子

羅拉人氣咁勁，去到邊都咁「惹蟻」，連哈利王子都晒流口水，一到場就係咁撩羅拉傾偈。當哈利離開之後，羅拉就拿拿聲同單車隊隊友積遜堅尼糖黐豆。積遜堅尼今年24歲，喺倫奧亦奪兩金，佢兩個門當戶對，本來二人發展緊地下情，今次畀人影到，羅拉焗住喺twitter承認戀情。

咁啱碧咸同三個囝囝就坐喺佢哋前面，「萬人迷」見記者向佢呢邊起勢影相，初時都不以為意；但後尾發覺後面「有嘢睇」，一度好心叫對癡男怨女「停口」，但佢哋咀到興起一於少理。有耳仔嘅人都聽到佢兩個咀到啜啜聲，「萬人迷」三個公子就不停睇好戲，仲問老竇佢哋搞乜嘢添！

「神奇的沙」唔黐身

講番今屆沙排賽事特別精彩，據報賽事採用「神奇的沙」，所有沙經過特別挑選，完全沒有夾雜碎石，最「神奇」係沙完全唔會黐身，金牌選手華舒亦大讚：「呢啲沙真係好神奇，又柔軟、踩上去好舒服！」

本報綜合報道