楊鶴善獲贈新居獻雙親

南韓「跳馬之神」見證人窮志不窮！楊鶴善喺倫奧跳馬決賽中贏得金牌，事後有傳媒爆料，指楊鶴善家境貧困，雙親至今仍住喺溫室改造成嘅塑料棚屋。如今揚威奧運，即刻有企業送層靚樓畀佢，等孝順嘅善仔可以得償所願，同父母齊齊住大屋嘞！

來自南韓鄉村嘅楊鶴善，先後喺世錦賽同奧運贏得跳馬金牌，證明佢喺呢個項目上已經無敵手，難怪南韓傳媒隨後已為佢冠上「跳馬之神」嘅稱號。同時，南韓傳媒仲發現，呢位體操選手出身寒微，父母住喺郊區一間由溫室改裝成嘅棚屋，而楊鶴善一直希望喺奧運奪金，用獎金幫父母改善居住環境。

如今楊鶴善一躍成為國家英雄，總部設喺南韓光州嘅ＳＭ集團就表示，佢哋主席睇到楊鶴善家人嘅居住環境後，願意提供一套面積達116平方米（約1,248呎）嘅公寓給他當做禮物。雖然新居要明年底先竣工，但總算為楊鶴善慳番唔少，善仔入選國家以後，每個月只有約6千幾蚊港紙運動員津貼，梗係要住棚屋喇！

與此同時，楊鶴善仲希望自己嘅事迹可激勵更多南韓青少年投入到體操：「南韓代表團嘅目標係殺入獎牌榜前十，我好高興自己可以為此作出貢獻。體操喺南韓唔算流行，我知好多從事體操訓練嘅青少年會因為我呢面金牌受到激勵，希望有更多小朋友投入到體操運動。」