今晚奧運男足四強大戰，亞洲雙雄日本同南韓分途出擊。日本男奧足今屆一鳴驚人，對手墨西哥男奧足剛激戰120分鐘，仲未回得切氣，平手盤撐硬日本。而剛淘汰東道主英國隊嘅南韓奧足，面對飄忽不定嘅巴西男奧足，賽前已表明用穩健防守抗衡，實行同對手「大耍太極」，加上 「太極虎」近四場半場都打和，呢場「半場和」有計。
（有線63、203及18台周三凌晨零時直播墨西哥對日本，周三凌晨2時45分直播南韓對巴西）
日本今屆主打穩守突擊，但每場都製造好多攻勢，這有賴指揮官清武弘嗣嘅穿針引線，經常以一腳妙傳威脅對手造成殺機，並激活之前頻頻失機嘅永井謙佑同大津祐樹，加埋山口螢、東慶悟同扇原貴宏，六人喺前場做好逼搶令對手犯錯，亦減輕防線嘅壓力，令較為保守嘅451陣式變得反擊如潮，四場入得五球算少喇！
墨西哥係典型鍾意上腳、節奏偏慢嘅美洲球隊，正正畀日本食住，加上剛同塞內加爾激戰120分鐘，計體力都輸成條街啦！日本眾將上下一心，氣勢如虹，難得唔使讓波，一於支持「瀛仔」贏波晉級。
至於另一場南韓對巴西，後者前四場未遇強隊，但中堅祖安古靴美同拉菲爾達施華甩漏多多，成為後防計時炸彈，隊長堤亞高施華亦獨力難支，領隊文奴文尼斯考慮用般奴烏維里代替前者，可見巴西唔係想像中咁勁。南韓今屆由名宿洪明甫掌帥，呢位昔日鐵衞調教防線果然有一手，從四場只失兩球嘅表現可見一斑。賽前洪帥就話，巴西欠缺有默契嘅團體合作，並表明會先做好防守，預計南韓會頂得住巴西進襲，況且南韓近四仗半場都打和，今仗追多鋪「半場和」。