奧運女神逐個篤
數數手指，奧運已過咗大半，大家除咗留意運動員嘅血與汗之外，唔少體壇靚女都係焦點之一，引嚟一片奧運「講女潮」！提起「講女」，又點少得卓韻芝（阿芝）呢？雖然呢位多棲創作人最近因籌備楝篤笑而周圍「Dislike」人，但講到奧運都有留意，仲會妙語連珠寸爆「體女」，兼同大家分享吓佢點樣「Like」同「Dislike」呢班體壇女神！
彭迪爾頓 人氣車神
簡介：咪以為單車運動員都係大髀粗粗，凡事都有例外，佢就係兩屆金牌得主、英國單車索女彭迪爾頓。佢曾做過男士雜誌《FHM》嘅封面女郎，令佢人氣急升，廣告代言應接不暇，其中更化身已故女星柯德莉夏萍的經典電影造型，性感得嚟不失脫俗。
Like：佢個男友Scott Gardner好正，識揀，呢個我Like！
Dislike：乜佢化咗妝，同唔化妝兩個樣！Dislike！仲有，佢贏咗香港嘅李慧詩，搞到佢只得銅牌，更Dislike！
萊琳‧弗朗歌 索到標血
簡介：大家如果好記性，或者記得「田徑第一索女」萊琳‧弗朗歌！呢名巴拉圭標槍名將，天生一副明星相，不但樣貌標致甜美，仲擁有豐滿上圍同高挑身材，難怪能成為06年巴拉圭小姐亞軍，之後仲做埋model，人氣拍得住電影明星。
Like：相信望住佢玩標槍，成班男觀眾唔止標槍，血壓即刻「標」高晒！
Dislike：點解佢唔着番呢套衫去玩標槍？相信標得仲勁！
淺尾美和 三棲靚女
簡介：現年26歲嘅淺尾美和擁有一雙修長美腿，可媲美台灣名模林志玲，具備模特兒身材，因而可以同時兼顧沙排、電視及模特兒三棲發展，人氣長期高企。曾經獲得日本著名服裝設計師桂由美邀請，擔任春夏時裝模特兒。
Like：佢唔使我Like啦！大把宅男會Like o架嘞！
Dislike：佢影啲相咁似AV封面，你真係肯定佢係運動員？邊種運動？男女混合o架？
潮田玲子 宅男至愛
簡介：日本羽毛球女將潮田玲子憑爽朗鄰家女孩形象俘虜無數球迷嘅心，除咗成為廣告商寵兒之外，亦參加電視節目演出，擔任婚紗模特兒，出過DVD同寫真集，甚至獲得漫畫商邀請，將佢嘅比賽事迹，改編成漫畫《DOUBLES～OGUSIO物語～》。
Like：出過寫真集，可去打o靚模喎！應該可以殺出一條新血路！
Dislike：下年一定要請佢嚟書展打o靚模！
舒拉寶娃 睇得打得
簡介：舒拉寶娃一直希望大家唔好淨係關注其靚樣，而忽略佢球場上嘅努力，但靚女多人睇係人之常情。放眼當今網壇，寶娃無疑係最美艷、最耀眼嘅巨星，呢位已盡攬四大滿貫嘅俄羅斯大美人，唔似古妮歌娃般曇花一現，唔止睇得仲非常打得。雖然最後佢喺奧運女單決賽輸咗畀美國嘅細威，但一面銀牌卻已相當難得。
Like：我班外籍朋友話俄羅斯妹好惡o架！千祈唔好得罪！逼住要畀Like！
Dislike：亦因為佢好惡！所以我都Dislike佢！
伊雲娜域 熱情奔放
簡介：雖然近年事業發展差強人意，但塞爾維亞網球手伊雲娜域依然美麗，其典雅氣質及性感打扮，加上熱情奔放嘅性格，成為傳媒寵兒。伊雲娜域曾登上英國《FHM》拍寫真，無論着比堅尼定係薄紗短裙，都難佢唔到。
Like：我勁Like佢嘅膚色，真係好靚！
Dislike：我自己都有睇網球，記得有次佢輸波喊得好淒涼，唔好再喊嘞！再喊唔靚o架！
佩歷珍妮 甜到漏
簡介：來自意大利嘅女泳手佩歷珍妮，喺2004年雅典奧運就以16歲之齡奪得200米自由泳銀牌，亦成為意大利史上最年輕奧運獎牌運動員。雖然今屆攞唔到金牌，但佢一副甜美樣子，仍然吸引唔少追求者。
Like：早幾日係佢生日，見佢牛一就Like吓佢啦！
Dislike：佢平時着嚟熱身嘅泳衣都幾肉酸吓！
萊絲 勝在夠Nice
簡介：澳洲靚女飛魚萊絲，四年前喺北京奧運贏得三面金牌，雖然今屆衞冕失敗，但人氣依然強勁。雖然萊絲並非美艷動人，但經常笑臉迎人，畀人一種好親切嘅感覺。
Like：我睇過佢個網，見佢超鍾意自拍，相信Edison應該好Like佢！
Dislike：佢個樣好似尋晚喺中環，同我爭的士個女仔！Dislike！仲有，叫佢唔好成日紮馬尾，髮線會後移o架！