日本新興勢力與傳統國技足球同柔道，於今屆奧運表現各走極端，猶如天堂與地獄。日本柔道的成績差強人意，男子柔道更歷史性交白卷，搞到柔協會長吉村和郎引咎辭職，認真羞家。相反日本男、女足愈戰愈勇，齊齊殺入4強，「東瀛足球」已立足世界列強。
兩大10號隊長的對決中，澤穗希技術性擊倒瑪達，帶領日本女足以2:0戰勝巴西女足，進身準決賽。日本於近四次大賽三度殺入四強，成績出眾，證明唔係曇花一現。
今仗巴西一開波就採取主動，頻頻向對方施壓，全場射門係21:10，可惜瑪達同拍檔姬絲蒂安妮不斷錯失黃金機會。日本以快速反擊同對手周旋，最終憑住兩大箭頭大野忍及大儀見優季兩次單刀得手，以兩球淨勝「森巴兵團」。
今仗焦點在兩大10號澤穗希同瑪達身上，澤穗希不斷為前線提供火藥之餘，在防守上亦非常落力，經常見到她返後防守瑪達的場面，呢種精神感染了身邊的隊友。相反，瑪達今場屢失良機，仲愈踢愈躁，打唔出應有的水準。
日本晉級後，將會面對法國女足，這是該隊近四大賽中三次打入四強，上年更歷史性贏得世界盃冠軍，東瀛足球的急速進步，實在不容忽視。
日本男足亦有好表現，繼分組賽力挫賽前奪標大熱西班牙，昨晚於8強亦以3:0擊敗有超過半場時間十人應戰嘅埃及，昂然進身4強。
此外，加拿大女足爆冷以2:0擊敗東道主英國，準決賽將遇上美國。