日本創立柔道接近130年，屬奧運項目兼日本國技，無奈日本柔道代表隊喺今屆奧運表現大失所望，全數14個柔道金牌只有女子57公斤級嘅松本薰，可為日本隊保住其中1面金牌，男子隊更歷史性1金都冇，所謂國技已名存實亡，賽前揚言「柔道一統」目標，如今只淪為笑柄。日本柔道協會委員長吉村和郎對於柔道隊差劣成績負起全責，已宣布辭職。
其實柔道向來都係日本奧運「金庫」，以2004年嘅雅典奧運為例，日本柔道團隊狂掃8面金牌，盡顯超班實力，但歐美選手經過反省及加強訓練之後，成績開始有改善，亦令日本隊感受到強大壓力。今屆倫敦奧運會，日本柔道隊更被推入萬丈深淵，幸得松本薰力抗強敵，令日本不至於捧蛋，但已令日本面目無光。
日本柔道男隊主教練筱原信一表示，日本選手於技術層面毫無問題，但比起外國選手，日本最輸蝕係精神力量薄弱。至於南韓柔道男隊主教練鄭勳亦有類似見解：「日本運動員技術高超係不爭事實，但柔道並非純技術較量，力量及意志都係好重要。」