菲比斯又創紀錄！繼200米個人混合泳三連霸，佢喺奧運男子100米蝶泳決賽於最後關頭發力衝刺，力壓來自南非及俄羅斯等勁敵，贏得今屆倫敦奧運第3面金牌，亦係第2個奧運三連冠，為個人項目嘅「謝幕戰」畫上完美句號。
已累積21面奧運獎牌嘅菲比斯已多次公開表示，將會喺倫敦奧運會之後結束運動員生涯，唔想日日再跳入水中受苦。早前菲比斯趁空閒與朋友到海灘玩樂，朋友問菲比斯點解唔一齊落水玩，菲比斯竟反問朋友：「你知唔知我生命中有幾多時間留喺水入面？」
完成自己所有單項之後，菲比斯終極一戰就係團體項目男子4×100米混合泳接力，菲比斯負責游強項蝶泳。美國隊喺預賽嘅成績唔錯，相信澳洲、英國及日本都好難威脅到美國隊，菲比斯能否以金牌完成游泳生涯，大家拭目以待。