巴西柔道選手拉菲爾施華，喺倫敦奧運男子100公斤以上級別柔道賽摘得一面銅牌，就連前巴西足球巨星朗拿度得知呢個消息後，都表現得異常激動！不過，「大哨」開心之餘都不忘喺twitter上幽默一番，佢表示驚訝並佩服拉菲爾施華嘅體重達到300幾磅，仍然能贏到呢面獎牌。
為巴西贏得呢面銅牌嘅拉菲爾施華，身高2米03，體重達到155公斤（約342磅）。眾所周知，「大哨」因為患上甲狀腺功能減退症，令佢體重瘋狂飆升且難以控制。來到職業生涯尾段嘅朗拿度，喺球場上跑唔郁，最終只能選擇退役。
所以話朗拿度嘅退役同自己嘅體重有好大關係，難怪佢話自己喺證實咗拉菲爾施華嘅體重之後都大吃一驚，感慨體重去到咁重嘅地步都能夠喺運動場上比賽，而且仲可以攞到柔道100公斤級別嘅銅牌，難怪「大哨」喺自己嘅twitter寫道：「我已經確認佢嘅體重，都唔知佢點可以做到嘅……」
睇嚟朗拿度想講嘅應該係：「我未肥到你咁樣已經踢唔到波，你居然仲攞到銅牌，有冇搞錯！」其實，如果「大哨」早啲轉玩柔道，都可能有機會攞到牌喎。講開又講，拉菲爾施華睇落都同朗拿度幾似樣，兩個都係面圓圓肥嘟嘟，如果佢兩個一齊剃光頭出現，相信都幾難分得到邊個打邊個。