男奧足最後一輪分組賽吹細風，除最早時間舉行嘅兩場C組分組賽，其餘三組六場分組賽全部開細，合共只交出四個入球，賽前已篤定出局嘅西班牙於D組最後一場悶和摩洛哥，三戰零入球執包袱走人認真羞家。
D組另一場賽事日本和洪都拉斯同樣互交白卷，結果兩軍攜手出線，日本八強對手係埃及，洪都拉斯則會挑戰大熱門巴西。B組墨西哥以一比○小勝瑞士，力壓太極虎南韓取得小組首名，八強將會鬥A組次名塞內加爾。