英國「跳水王子」戴利雖然喺男子雙人10米賽連獎牌都無而失禮街坊，但佢嘅勁「正斗」沖身浴照卻令佢人氣超級爆升！更「爆」嘅係幫手設計英國隊服著名Designer Stella Mccartney，即係保羅麥卡尼個女，尋日接受專訪時就大爆戴利嘅「小兄弟」太難服侍。同時，呢位「跳水王子」更吸引到索女歌手Cheryl做fans，仲要求戴利教佢跳水添！
今次英國奧運隊隊服係由名設計師Stella Mccartney一手包辦，呢位「披頭四」成員保羅麥卡尼嘅千金，雖然已經40歲，但佢言行一樣咁「爆」。
最近Stella接受電視訪開時，就話今次設計最棘手嘅，就係戴利條「三角嘜」泳褲：「喺成個設計過程中，最大挑戰係戴利嘅泳褲！點解咁煩？係因為我不得不加入一小塊有彈性布料，而呢塊布用嚟做咩？咪就係用嚟托住嗰度囉。」相信各位正因戴利沖身誘人浴照而流晒口水嘅女fans，聽到呢段訪問後將會流更多口水，想引死人咩！
人紅就自然多人冧，甚至連一向眼角高嘅前「A高嫂」Cheryl，都專登喺戴利嘅twitter上留言話：「你喺奧運嘅表現真係好『Amazing』！搞到我好想跳水，你可唔可以教我呀？」有如此性感尤物向你招手，戴利都係男人，當然要以一貫男人嘅做法「(舌累)飯應」：「梗係好！但你以後都要多啲關注我o架！」