西班牙大熱倒灶，另一支奪標熱門巴西則繼續踢出王者風範，佢哋喺C組面對白俄羅斯雖然先失一球，但憑柏圖、尼馬及奧斯卡杜斯山度士各建一功，以三比一反勝對手，兩戰全勝提早出線八強。
白俄羅斯上半場九分鐘由雷蘭巴甸尼頂入先開紀錄，不過柏圖六分鐘後回敬一記頭槌入波追成一比一，換邊後成為尼馬表演時間，佢先喺六十五分鐘射入世界波助巴西反先，然後補時階段後踭妙傳奧斯卡杜斯山度士埋齋，結果巴西勝三比一提早出線。白俄羅斯輸波後以三分排第二，埃及、新西蘭暫得一分，最後一輪除非新西蘭爆冷贏巴西，否則白俄打和埃及亦可取得八強席位。