傑斯開齋助英國首捷
有主場之利嘅英國男奧足，喺溫布萊球場以三比一擊敗阿聯酋男奧足。經過第一場打和塞內加爾之後，英國整體演出有明顯改善。而今場其中一個焦點球員就係傑斯。呢位38歲老將除為英國奧足取得今場首個入球之外，更打破了一個保持長達88年嘅紀錄！
破88年最老「士哥拿」紀錄
於1924年巴黎奧運足球賽，埃及以三比○擊敗匈牙利，埃及球員赫加斯以37歲225日取得入球。而今次英國男奧足對阿聯酋男奧足，傑斯以38歲243日攻破對手大門。對於傑斯成功打破舊紀錄，在場球迷都站立鼓掌向佢致敬。
基於傑斯早就選擇威爾斯作為代表國，故此喺奧運會中並未有唱英國國歌，有球迷不滿傑斯欠紀律及不尊重。而對於球迷嘅不滿，傑斯接受英國《太陽報》訪問時就咁講：「唱國歌係個人選擇，我毋須為任何人解釋。我希望英國隊下仗在威爾斯對烏拉圭時，威爾斯球迷唔好發出噓聲，大家都要百分百支持奧運隊。」另外，英國男奧足最後一場分組賽對烏拉圭，傑斯表示一定會同烏拉圭球員蘇亞雷斯握手。因佢話同蘇亞雷斯之間無問題，唔會將蘇亞雷斯與曼聯隊友艾拉有關種族歧視事件，帶入奧運比賽當中。