加時贏永倫72:65 南華甲一登基
昨晚於灣仔新伊館舉行嘅甲一組籃球聯賽季後賽，南華於劣勢下打至加時反勝永倫72比65，總場數勝3比1，重奪失落三年嘅聯賽錦標，當中打埋今季便退出甲一組聯賽嘅胡國鋒情緒最為激動，表示能夠助南華重奪冠軍係一個最完美結局。
南華比賽初段手風唔順，無論內、外線投射都發揮唔到應有水準，第一節曾最多落後9比20，完半場永倫領先31比15。進入第三節南華開始發力，相反永倫愈打愈走樣，去到第四節完場前一刻，南華憑胡國鋒射入兩個罰球，追成63比63平手，令比賽進入加時。
胡國鋒完美告別
加時階段，南華兩主將陳張敏及劉子健雖已五犯離場，不過其他球員愈戰愈勇，最終勝72比65，打破永倫衞冕美夢，連同銀牌冠軍成功榮膺今季雙冠王。
南華羅意庭攻入全場最高19分獲選今場MVP，但賽後焦點落在胡國鋒身上，本身係消防員嘅阿鋒早前決定打埋今季便會退出甲一組：「下季只會打盃賽，聯賽就唔會再打，今場能夠喺劣勢下反勝對手，覺得份外開心同激動。」南華班主洪游奕賽後特別送贈鮮花畀胡國鋒，感謝佢對球隊嘅貢獻，隊友亦開心到將胡拋起慶祝。