贏得金牌的運動員日後可能要諗清楚先決定咬唔咬牌，因為這舉動可能會令獎牌容易「受傷」。由於國際市場的貴金屬價格都處於歷史高位，令倫敦奧運會的獎牌因慳成本而被迫減料。因此同樣係獎牌，其實質價值卻比從前歷屆的獎牌跌不少。當中以銅牌的價值更堪稱史上最Cheap，造價只係5美元（約39港元），在香港地頂多夠食碟叉雞飯醫吓肚餓，難怪唔少人聽完都「O晒嘴」!
記得上屆奧運開始時，黃金價格仍處於低水平，但現時已到達一個極高水位。因此，今屆奧運金牌雖然重400克，但倫敦奧組委精打細算，每面奧運金牌僅薄薄的鍍上一層金，其含金量僅6克，只係佔總重量1%；93%為白銀，另加6%的銅，整面金牌面值約650美元（約5,070港元），至於銀牌的價值則約為335美元（約2,613港元）。
與金銀牌相比，銅牌的價值就認真Cheap爆，一面奧運銅牌的實質價值只係5美元（約39港元），在外國某些城市，買一個芝士漢堡飽都唔止呢個價錢，而在香港地，都可以喺街坊食堂買到盒叉雞飯嘅。
相比之下，1980年紐約冬季奧運會的金牌價值就高得多。據媒體透露，那屆冬奧的金牌按今天的金牌價格計算約值1,000美元（約7,800港元）。不過，奧運賽場的獎牌並不是由成分和價值去衡量，因當中包含運動員和其團隊背後所付出的努力，先至係最大價值，但$39一面獎牌，又確係過分咗少少。