鮑維認處男笑爆保特
奧運村嘅怪事無奇不有，之前有運動員大爆喺奧運村搞性派對，言猶在耳，喺田徑好手保特同鮑維出席記者會時，被問到有關奧運村內15萬個安全套被迅速清光一事，前者面露尷尬稱未搵到對象而用唔着，鮑維則語不驚人誓不休，乾脆話自己仲係處男，此言一出立即令全場笑爆嘴！
行程趕用唔着安全套
有關奧運村怪事多多，當兩名牙買加田徑好手保特同鮑維出席記者會時，被一名女記者問到，倫敦奧運村內嘅15萬個安全套係咪好快被掃晒？保特同鮑維淨係識得傻笑，之後保特就話唔知奧運村有提供安全套：「我哋嘅行程好趕，連識朋友都冇時間，點搵對象呀？咁樣啲安全套點用得着呢？」保特即時眼尾盯住鮑維，估唔到笑到肚都攣嘅鮑維竟自爆一句：「我冇用過，因為我仲係處男。」果然一鳴「驚」人，即刻令全場400多名記者笑到收唔到聲。