北韓女足嬲爆拉隊離場
倫奧連幕都未開，比賽第一日開打就大擺烏龍，搞到北韓女足一度罷踢！倫奧女足賽事前日率先開波，於北韓對哥倫比亞賽前，大會竟錯將南韓國旗認作北韓國旗，顯示於介紹球員出場嘅大螢光幕上。北韓女足嬲到震拉隊離場，等到大會出番正確國旗先肯比賽，而賽事就咁延遲1小時零5分鐘。
倫敦籌辦奧運多時，當然希望搞得好好睇睇，點都估唔到第一日就錯漏百出，簡直令倫奧組委會面目無光。此場賽事原本於當地時間晚上7時45分，於格拉斯哥咸頓公園球場開波，北韓女足早就抵達場地。但當大會於巨型螢光幕上，介紹北韓球員時候，就擺咗大大張南韓國旗於北韓女將相片旁邊，球隊上下當然扯火，即時拉隊離場。
擾攘1小時零5分 照贏哥國2:0
主辦單位出錯後即刻補鑊，一面出番北韓國旗，一面說服球隊落場，到最後擾攘到晚上8時50分先開到波，北韓女足贏2:0完場。賽後領隊金廣閔仲好躁﹕「大會犯下嚴重錯誤，或者會搞到我哋一身蟻，唔嬲就假啦！贏波都補唔番！」
大會道歉聲明都有錯
大會之後出官方聲明耍冧，點知國家名又錯﹕「將北韓國旗（North Korean flag）掉轉成南韓國旗（South Korean flag），明顯係犯上錯誤，我哋向北韓女足同北韓奧委會道歉，確保唔會再度出錯。」查實Republic of Korea（南韓）及Democratic People's Republic of Korea（北韓），方為兩國於國際奧委會官方英文稱呼，大會要出第二次聲明先糾正錯誤。主辦單位做嘢咁唔小心，睇嚟未來仲有排錯！
本報綜合報道