菲比斯水怪唔識撲水

27歲嘅菲比斯四年前京奧一人攞8金，堪稱「水上最強」，理應豬籠入「水」，但佢過去一年收入只有700萬美元，明顯「收入與地位不相配」。菲比斯有金牌、冇金錢，好大程度因為佢生活唔檢點，曾被踢爆吸食大麻、超速駕駛等劣行，破壞個人形象，即使手上擁有11個贊助合約，但金額比唔上其他體壇明星。

形象差20大不入

除咗麻煩多多之外，菲比斯平時亦不修邊幅，例如影奧運證件相時，頭髮凌亂、鬍鬚滿面，件衫又皺，容貌烏眉瞌睡，被嘲諷似通緝犯。佢仲死撐話因為賽會規定，證件相唔可以笑到見牙齒，所以冇咁靚仔喎。菲比斯唔自我檢討，仲要賴三賴四，難怪搵唔到食。

勒邦占士做「阿二」

至於費達拿出名顧家錫老婆仔女，加上獨具「貴氣」，深受廣告商垂青，由上年七月至今，廣告贊助已達4500萬美元，比賽獎金有930萬美元，可見個人形象直接決定運動員收入多寡。今次20大排名榜，網球及籃球佔十九席，七人係網球員，中國女將李娜位居第十位。十二位籃球員之中，美國隊勒邦占士及高比拜仁分列第2、第3位。唯一非球類上榜運動員係牙買加飛人保特，以2,030萬美元排第七位。

本報綜合報道