畀迪帥「賣豬仔」
事緣今年5月尾，迪保斯基正為揀邊個前鋒打歐國盃而苦惱，阿祖安盧比斯喺拍跳塞爾維亞之役橫空降世，以一個士哥加博得12碼，完成個人大國腳處子騷，贏盡掌聲。賽後迪保斯基表示甚為賞識此子，看來入選在望，點知一日之後，阿祖安盧比斯名落孫山，迪帥寧願揀狀態麻麻的尼格度，搞到佢一場歡喜一場空。
其實，阿祖安盧比斯薄有名氣，貴為上年U21歐國盃神射手，上季不但帶領馬體會喺歐霸稱王，自己亦成為賽事銅靴得主。由於唔係司職中鋒，走位飄忽，令佢可像法比加斯咁裝「假9」，適合無鋒戰陣。既然迪保斯基唔識貨，盧比斯一於化悲憤為力量，於倫奧係咁數胡，袋番個奧運金牌威畀佢睇。