有人生成冠軍命，真係唔恨得咁多，講緊邊個？咪就係查維馬天尼斯同桑馬達，雖然之前喺歐國盃只係行行企企，但兩人已替「蠻牛」西班牙連奪三個大賽錦標，未斷過纜，仲犀利過卡斯拿斯同沙維，加埋剛重返巴塞嘅佐迪艾巴，「奪金三王」氣勢如虹，誓要助「鬥牛國」繼92年巴塞隆拿奧運封王後，一搔20年之癢，重奪奧運金牌。
唔好睇查維馬天尼斯同桑馬達冇乜「蒲頭」，其實兩人早已成為大國腳，並且係世盃及歐國盃冠軍隊成員，連埋上年於U21歐國盃封王，佢哋連續三年為國効力都有冠軍落袋，桑馬達更隨車路士奪得足總盃及歐聯，今年認真旺佢。
今次「降格」出戰奧運，查維馬天尼斯與桑馬達由配角變身主角，肩負起領軍重任，強如沙維同佩奧爾，亦曾於2000年悉尼奧運決賽輸畀喀麥隆。如果佢哋連奧運金牌都擸埋，就真係威過威士忌。
跟上述兩位「閒人」唔同，佐迪艾巴喺歐國盃係正選左閘，打足六場，仲喺決賽有波入添，憑住出色表現，令巴塞「知錯」力邀回巢，依家入選埋奧運隊，成為呢個暑假大紅人。雖然唔係上年U21奪標功臣，但領隊路爾斯米拿對佐迪艾巴青睞有加，正係睇中佢喺邊路嘅爆破能力，為行軍偏慢嘅西班牙提速。
桑馬達、查維馬天尼斯、佐迪艾巴分布前中後三線，挾住剛奪歐國盃嘅旺氣，且看好波又好運嘅「奪金三王」能否再下一城，協助西班牙繼84年法國之後，成為另一支同年囊括歐國盃及奧運嘅球隊。
年齡：23歲
位置：左閘
現効力球會：巴塞隆拿
佐迪艾巴是典型的出擊型翼衞，經常利用速度壓制對方邊路的攻守，擅於同隊友組織進攻，回防意識極強，於左路攻守兼備。
年齡：24歲
位置：翼鋒
現効力球會：車路士
西班牙中前場萬能老倌，不但可居中策動進攻，其後上埋門亦甚有功架，加上具備一定速度，令他能勝任邊路側擊。
年齡：23歲
位置：中堅、防守中場
現効力球會：畢爾包
呢位中場出身的畢爾包悍將，上季改任中堅，表現大受好評，其粗中帶幼、勇而不茅的踢法，受到拜仁、巴塞等豪門垂青。
文：譚子健