中國奧運女子泳手慘遭變態佬偷窺！昨日英國《約克郡晚報》爆料，一名25歲當地男子，躲於國奧游泳隊訓練基地廁格中，偷睇三名中國選手換衫，被發現時仲扮女人聲希望甩身，但最終都落網，佢於庭上直認想對女泳手作出性侵犯，認真狼胎！
中國游泳隊為備戰倫奧，早前已飛抵英國，並進駐利茲訓練中心練水，但估唔到不足一周就發生不愉快事件。三名女選手上周五練習過後到更衣室換衫，期間發現其中一個廁格發出可疑人聲，就搵工作人員睇睇。
當工作人員敲該廁格門時，25歲嘅英國青年哥斯比，竟扮女人聲希望蒙混過關，但當然呃唔到人；當佢奪門而出時，就被警察捉住。
哥斯比好快就被安排上庭，原來佢早有前科，曾多次偷窺、偷拍女性沖涼，09年仲因企圖強姦而被判入獄三年，估唔到一出冊就再犯事。哥斯比承認睇到三名中國女將換衫，仲想衝出去作出性侵犯，好彩受害者發現得早，唔係就會發生更加不幸事件。當地法庭會於稍後時間對哥斯比作出懲處。
報道中未有披露受害者名字，希望此宗不快事件，唔會影響到中國女子游泳隊爭金心情。
本報綜合報道