冇天使面孔，冇魔鬼身材，澤穗希用行動證明做女神毋須天生麗質，走實力派路線一樣可以大紅大紫！澤穗希去年帶領日本女子足球稱霸世界盃，當選MVP兼神射手，仲做埋FIFA球后，成為地上最紅女子足球員。「希姐」今次帶病出征，以四朝元老身份出戰奧運，將會繼續瞓身搏殺，希望一圓奧運金牌夢！
澤穗希其貌不揚，但於球場上擁有神奇魅力，能凝聚隊友力量，上年日本於女子世界盃以弱勝強擊敗女足霸主美國，「希姐」幾近以一人之力助球隊一圓稱霸世界美夢，實在功不可沒。日本登上世界冠軍后座，澤穗希成為神射手，同時當選MVP，更成為FIFA最佳女子足球員，地位等同美斯，佢被日本人視為超級英雌捧上神枱，當地女子球員都以佢為目標，「希姐」女神地位無可動搖。
澤穗希年僅15歲就入選國家隊，至今已經代表國家隊18年，為咗足球事業，佢放棄入大學，仲離鄉別井去美國搵食，後來又同美籍男友分手，犧牲一切，完全係為咗幫國家隊爭取創造歷史。發完世盃美夢後，呢位傳奇球星仍然未肯言退，早已高調訂下新目標：「我想喺倫敦奧運取得金牌，為所有女子球員帶來理想同目標，對日本人嚟講，冇嘢係冇可能！」
澤穗希年初患上耳石症，學名為「良性陣發性姿勢性眩暈」，患者會有頭暈或耳鳴等徵狀，令「希姐」一度要休戰養病。不過，為圓奧運金牌夢，佢仍然會頂硬上，希望創造另一次奇迹。
年齡：33歲
身高：1米64
位置：中場
球會：INAC神戶
國家隊上陣次數/入球：181/81
主要榮譽：女子世界盃冠軍、MVP、神射手（2011）、日本年度最佳女子球員（2011）、FIFA最佳女子球員（2011）