今屆倫敦奧運中國嘅官方獎金終於有定案，每塊金牌可得50萬元人民幣（約60萬港元），比84年洛杉磯奧運金牌所得獎金暴升83倍，不過以今時今日嘅中國，50萬人仔只係小數目，來自地方同贊助嘅獎勵先至和味，好似林丹如果能夠衞冕羽毛球男單金牌，其商業價值將以千萬人仔計算。
其實今次定出50萬人民幣獎金，已係國家體育總局歷來嘅最高金額，睇番歷屆奧運中國嘅官方獎金，84年洛杉磯奧運僅得6,000人仔，中國史上第一金嘅許海峰都係得9,000人仔，88年漢城奧運係15,000，96年亞特蘭大升到8萬，00年悉尼奧運有15萬，04雅典奧運有20萬，08北京奧運加到35萬。
再睇奧運冠軍實際所得，原來國家獎金嗰份最細，事關淨係霍英東基金嘅一公斤足金金牌另加8萬美元（約62萬港元），已經多過官方獎金好多，仲有來自所屬省市獎勵同廣告代言，郁吓都超過7位數字，嗰啲先係奧運冠軍主要收入。
有權威媒體指出，自姚明與郭晶晶退役，劉翔有待再闖高峰，中國體壇巨星出現真空，形象健康嘅「超級丹」林丹成為新一代吸金王，全年廣告收入超過200萬美元（約1,560萬港元），只要佢再衞冕羽毛球男單金牌，勢必財源滾滾，區區50萬人仔國家獎金，用嚟交稅都未夠啦！