奧運會嘅格言係更快、更高、更強（Faster,Higher,Stronger），但更富（Richer）亦好緊要，正所謂「重賞之下必有勇夫」，有獎金、獎品，班運動員自然更加努力搶牌。原來除咗獎金之外，以往唔少國家都設有「特色禮物」畀金牌運動員，內容千奇百趣勁有Fun，真係唔講你唔知！
係人都知德國人嗜「啤」如命，無論何時何地都鍾意「啤一啤」，去到當地每一個角落，都會見到德國人舉杯暢飲，唔少仲飲到「啤啤夫」添！為咗獎勵金牌運動員，德國奧委會實行畀佢哋飲到夠，大送啤酒投其所好。上屆北京奧運所有德國冠軍，都得到每月免費享用50升啤酒，本地一罐普通啤酒約355毫升，即係約141罐左右。
當香港人成日怨通貨膨脹，一罐午餐肉要廿蚊罐嘅時候，其實有啲國家通貨膨脹根本不受控制，一盒牛油、一隻雞髀貴到嚇死你。喺津巴布韋，一千億津元竟然買唔起一個麵包，畀獎金簡直係嘥氣。唔畀錢，好，就獎禮物，津巴布韋女子曲棍球隊喺1980年莫斯科奧運會奪金後，政府就每人送隻母牛做獎勵夠晒實際。
1896年首屆奧運會，希臘派出13人參加馬拉松賽事。國內好重視呢次比賽，極想攞到冠軍，所以賽前出現大量捐助者，有送靚紅酒嘅，有送一世免費剪髮嘅，亦有人願意送出2000磅朱古力。其中一個叫阿維奧夫嘅有錢人，仲願意將個女嫁畀得勝者。最後，24歲嘅鄉村郵差史派里頓路易斯技壓群雄奪金，但佢拒絕大部分獎品，亦冇接受阿維奧夫好意，因為佢已經結咗婚。