【本報綜合報道】英國奧運足球隊組軍一波三折，皮雅斯棄選碧咸舉世驚訝，依家又有効力熱刺嘅左翼衞加里夫巴利因背傷退出，不過由於佢唔係超齡球員，即使補選都冇「萬人迷」份，另外，籌委會為咗挽回聲勢，打算搵維多利亞同辣妹其他成員做開幕式表演嘉賓，十足十喺碧咸傷口上灑鹽。
英國奧運隊領隊皮雅斯當地時間今日會公布大軍18人名單，據知3名超齡球員分別係傑斯、比拿美及米卡李察士，碧咸一早事先張揚自己無份，喺臨公布之前英國隊又有壞消息，原本有機會出席嘅威爾斯球星加里夫巴利，喺最後一次訓練時，不幸背部及髖關節舊傷復發，所以決定退隊。消息傳出後，立即有聲音話補選番碧咸，但由於加里夫巴利唔係超齡球員，所以即使補選都唔會揀碧咸。
又最新消息又指，碧咸有可能成為其中一名火炬手，甚至係燃點聖火嘅候選人之一，不過一切都只係吹風，相反碧咸老婆維多利亞就好大機會成為開幕式表演嘉賓之一。Spice Girls成員MelC表示，大會早前邀請佢哋參與表演，但表演內容就唔可以透露。