大帝再練新招博冧莊

剛奪NBA總冠軍的熱火昨晨在邁阿密舉行勝利大巡遊，40萬名球迷上街夾道歡迎，一眾戰將個個High爆，心情勁靚的勒邦占士繼闖入新人婚禮之後，昨晨更拍心口承諾繼續自我增值，今夏會「練新嘢」同雷霆嘅KD杜蘭特鍊足一世，新季力爭冧莊！

勝利巡遊活動聲勢浩大，邁阿密警方出動大批警員維持秩序及護航，熱火職球員攜眷登上幾架紅色雙層巴士並由市中心出發，向沿途大約40萬位球迷揮手致謝，大巴之後穿梭20個街區抵達美航球場，繼續與15,000名球迷開Party。

日前突然闖入婚禮搞搞震，給予一對新人驚喜的占士，去年夏天拜師奧拉祖雲後練得一身低位進攻好本領，「大帝」昨日承諾今夏會繼續「練新嘢」，但就賣關子拒絕透露會跟隨那位名宿學藝，占士表示：「杜蘭特注定是我一生的對手，是我尋求突破的推動力，我會提早準備今夏的特訓計劃，做好準備力爭衞冕。」同時，韋迪自爆今夏會破天荒聘任投籃教練，改善外圍投射命中率。