中學時代嘅占士係兼顧籃球同美式足球嘅兩棲運動員學生，當年唔少分析指佢將來會打美式足球，但因一次意外導致手腕骨折，令佢放棄美式足球，從此專注籃球，高中時期更當選01至02年全國最佳球員。
占士一度宣布參加02年NBA選秀，但因當時高中未畢業被迫放棄，姚明成為02年狀元，一年後占士終有資格參加選秀，結果占士順利成為狀元，加盟騎士，首年年薪400萬美元。
効力騎士係占士嘅成長期，奠定「大帝」地位，既係明星賽常客，亦係08京奧金牌成員、廣告商寵兒，07年以年賺2,700萬美元打入福布斯25歲以下富豪榜前20名，騎士亦喺07年殺入總決賽，但不敵馬刺，屈居亞軍。
由騎士轉投熱火，占士不惜減人工都要走，由年薪1,570萬美元減至1,450萬美元，仲畀騎士球迷鬧爆，甚至燒波衫洩憤！不過，成績說明一切，熱火去年打入總決賽，屈居亞軍，今年捲土重來，令占士終於首嘗總冠軍滋味！
LeBron James
年齡：27歲
身高：2.03米