「整個聯盟入面，可能得韋斯布克一個人可以防得住杜蘭特」。呢個笑話，一早已經係一班「反韋斯布克派」來插佢嘅藉口。總決賽打咗四場，你會發覺雷霆缺少一個組織球隊攻勢嘅控球後衞。
控球後衞，唔係控住個球成場就完成任務，而係要將球可以順暢咁運轉。太陽嘅拿殊點解咁值錢？唔係因為佢可以每場攞到18分，而係佢每場可以成功幫助隊友得分，一場波10至15次助攻就可以幫到球隊拎20至30分，比一個人獨食入40幾分更加重要。
當然，Game4占士夏登失準，韋斯布克獨食少少無可厚非，但我更加希望佢可以帶動隊友「入局」。當每場可以入到10至14分嘅伊巴卡四場平均只得7分，當老將費沙落場後只變為定點射手，試問又點贏？
即使我點唔Like熱火，熱火確實打咗三場好波，三場團隊至上嘅好波。賽前我都話柏堤亞係今次決賽嘅×因子，結果佢4場入咗12個3分波，仲將杜蘭特威脅減到最低，如果最後熱火奪冠而回，柏堤亞絕對係地下ＭＶＰ。雷霆剩餘可以做，就係每一場當第七場去打。韋斯布克，成功失敗都在你手，希望你瞓醒後知道自己點做！
回合 香港時間 主隊 Vs 客隊
1 13/6 雷霆 105:94 熱火
2 15/6 雷霆 96:100 熱火
3 18/6 熱火 91:85 雷霆
4 20/6 熱火 104:98 雷霆
5 22/6 9:00am 熱火 Vs 雷霆
*6 25/6 8:00am 雷霆 Vs 熱火
*7 27/6 9:00am 雷霆 Vs 熱火
總成績 熱火3:1雷霆
註：7場4勝制 *如有需要才進行