雷霆Vs熱火，呢個總決賽戲碼絕對啱晒聯盟心水，對外對內勉強為ＮＢＡ總決賽收視吊命。對外方面，舉行緊嘅歐洲國家盃搶走唔少球迷同商業機會；簡單嚟講，歐國盃為提供直播嘅本港酒吧、茶餐廳、商場帶旺人氣，生意可以比平時上升兩三成，而由於ＮＢＡ七場總決賽都喺本港早上時間舉行，除咗專賣ＮＢＡ產品嘅舖頭外，根本無辦法為生意人帶來額外利潤。
對內方面，如果冠軍由老波骨同球風節奏較慢嘅馬刺、塞爾特人、湖人爭奪，難以吸引年輕一輩球迷注意，無論係新鮮感定商業因素，雷霆對熱火係必定要出現。
ESPN專家團入面，9個預計雷霆係真命天子，只有5個相信熱火贏波。有呢個預測，主要係因為雷霆呢班後生仔經過上季洗禮後，已經學識點樣打逆境波，而對手更係小牛、湖人同馬刺三隊前冠軍。個人認為，勝負因素在於柏堤亞可唔可以mark實杜蘭特？熱火會唔會採取更多雙人防守戰術招呼ＫＤ，寧願畀韋斯布克得到更多進攻機會？雖然雷霆內線雙雄柏堅斯同伊巴卡比熱火內線更勝一籌，但整體防守未必夠熱火好，一旦節奏被拖慢，分分鐘6場內就要講Bye Bye。
邱益忠